ضباط 8 ابريل

ان شاء الله يوم الاتنين الجاى الحكم النهائى على ضباط 8 ابريل (ده لو المجلس ملوش رأى تانى يعنى ولا حاجة) ربنا معاهم ويخرجهم بالسلامة بس ياريت الناس تتضامن معاهم وتقف جنبهم..

امبارح كده عرفت ان فيه 6 ضباط لبسولهم قضية جديدة ...وديه التفاصيل..

وجهت النيابه العسكريه التهم الأتيه لسته من ضباط 8 ابريل لتصبح قضيه إضافيه لهم إضعاف روح القوات المسلحه بالمشاده مع ضابط أمن السجن أمام الأهالي المدنيين في الزياره وعدم إحترام الرتب العسكريه وهم رائد/ محمد عمر ، نقيب/ محمد فهمي ، ملازم أول/ محمد وديع ، ملازم أول/ ياسر بخاتي ، ملازم أول/ رامي أحمد ، ملازم أول/ محمد الحنفي ..
22 ضابط دخلوا مكتب ضابط أمن السجن إعتراضا منهم علي إسلوب معاملة الأهالي أثناء دخولهم الزياره ، حصلت مشاده كلميه بينهم وعشان هو ضابط صايع وخدمته كلها فالمخابرات الحربيه الجميله إختار سته منهم سخنين ودمهم حامي وراح فاقعهم شكوي فالنيابه العسكريه واتبلي عليهم إنهم شتموه بأمه وكانوا هايضربوه وكسروا مستشفي السجن وإنهم بلطجيه ومحدش عارف يلمهم فالسجن
النيابه بعتت للضباط وراحوا وقالوا محصلش وكانت مشاده وتم التصالح وبعتت للسجن تستفسر عن الخسائر السجن كون لجنه ثلاثيه وأكدت إن مافيش خسائر أصلا بس الغريب النيابه نزلت القضيه جلسه بتهم تودي ورا الشمس بتوصيه من اللواء محمود حجازي عضو المجلس العسكري وكمان مرفقتش قرار اللجنه اللي قالت مافيش خساير فالسجن وقالت إكتفينا بالتحقيقات وده كله عشان عضو المجلس الموقر موصي ومش طايق الضباط ال...لي واجهته أمام الشعب بكلمة حق .

أما عن قانون ساكسونيا العسكري فدي كده الماده 166 من قانون ساكسونيا واللي بتخص السلوك المضر بالضبط والربط ومقتضيات النظام العسكري وتصل إلي ثلاث سنوات سجن ده إذا ما عملوهاش فتنه بين الجيش والشعب في ظل وجود أهالي الضباط المدنيين وأدوهم إعدام وكله طبقا لقانون ساكسونيا العسكري .. بس والله لهايجيلكم يوم وكل واحد هاياخد حقه بعدل الله مش بقانون ساكسونيا العسكري بتاعكم
وبعدين رتب إيه اللي عايزين الضباط تحترمها دي لما الرويني بيروج إشاعات والفنجري بيهدد الشعب وممدوح شاهين بيتلاعب بالدستور لحساب المجلس ومختار الملا الديكتاتور يتحدث عن الديمقراطيه والسيسي حافظ القرأن رجالته المخابرات شغاله بتعذيب ووساخه أكتر من أمن الدوله والعصار منافق وبيطلع يطبل للمجلس وعادل بتاع القضاء خلي القانون العسكري قانون ساكسونيا الضباط تحترم مين وعلي إيه هي فين الرتب العسكريه اللي يحترموها أصلا

طيب ياما الاهالى راحوا وخدوا وعود انه سيتم الافراج عن الضباط وطبعا لا حياة لمن تنادى وبعد القضية الجديدة تفتكروا هيحصل ايه؟

انا عن نفسى مقتنعة ان الضباط دول مش هيخرجوا طالما المجلس فى السلطة بس اتمنى ان الناس يكونوا عرفت قيمتهم وعرفت قيمة اللى عملوه وعرفت حقيقة المجلس اللى كل يوم بيبان وجهه القبيح

اشرف واشجع رجالة عرفتها فى حياتى

انا هكتب حاجة فى السريع عن الظباط الشرفاء اللى منهم اتحكم عليه بالعشر سنين ولسه فيه منهم متحكمش عليهم وربنا يستر اصلى بصراحة مهما قلت مش هقدر اعبر عن واحد على تريليون من اللى جوايا سواء تجاه الظباط او تجاه الناس اللى فعلا معندهاش ريحة الدم وعندها برود متناهى..ما علينا خلينا فى المهم..

انا مش هكرر نفس الكلام اللى قلته المرة اللى فاتت عنهم بس احب اضيف سؤال واحد بس..الظباط دول عملوا كده ليه؟ ضحوا بحياتهم ومستقبلهم وسمعتهم وعيلتهم(الظباط دول ليهم اهل على فكرة يعنى زى بقيت الناس مش جايين من كوكب تانى) عيلة مش بس اب وام لا فيه منهم متجوزين ومخلفين وفيه اللى كان مستنى بيبى وفيه اللى لسه كان هيتجوز..حد يفهمنى انا هضحى بكل ده ليه؟ عشان شهرة مثلا ؟؟..اكيد لا دول اتشوهوا من قبل ما ينزلوا..طيب يمكن عشان هياخدوا فلوس ولا حاجة؟ فلوس ايه الهبل ده مهما لو عايزين فلوس هياخدوا من المجلس بدل ولاء وهياخدوا مبالغ محترمة يعنى مش محتاجين ينزلوا..طيب يا ترى كانوا هيعملوا انقلاب؟ مين ايه فيين انقلاب!!!! اتقلاب ايه اللى انت جى تقول عليه ..انت عارف معنى الانقلاب ايه؟ لو كانوا عايزين يعملوا انقلاب كانوا هينزلوا معانا احنا ليه ومن غير سلاح ما كانوا نزلوا جوه وحداتهم وخلصت الليلة..

طيب امال نزلوا ليه؟

انا اقولكوا نزلوا ليه ..نزلوا عشان حسوا ان دم الشهداء بيروح هدر وان الثورة بتضيع وان احنا بيضحك علينا ونزلوا يطالبوا بنفس مطالبنا .نزلوا عشان حاسوا بقيمة الثورة اللى عملناها وتعبنا فيها وضحينا فيها بالغااااالى قوى وشايفنها بتروح قداهم فى طريق اسوأ من ايام مبارك نفسه...والناس بتقول غلطوا وبتلومهم ..ماشى بتلوموهم على ايه؟ على رجولتهم ونخوتهم وشجاعتهم وانهم مقدروش يشوفوا ظلم وفساد ويسكتوا..طيب ده احنا اللى هو احنا اللى منعرفش حاجة عن المجلس غير قليل مش طايقينه امال هما اللى عارفين بلااااااااااااااااااااااااااااااااااوى يعملوا..سبحان الله دلوقتى بنلوم الشريف الشجاع ونشجع الخاين الكداب..وعلى فكرة الظباط دول كلهم متوفقين ومشهود لهم بالكفاءة
وهتعرفوا بكره قيمتهم بس يارب ميكونش الوقت فات على الندم وهتعرفوا قيمة اللى عملوه
وده اسماء الابطال:
1-مقدم / اياد امام عشر سنين
2-مقدم / خالد الخولى عشر سنين
3-رائد / محمد عبد القادر عشر سنين
4-رائد / حسن عبد الحميد عشر سنين
5-نقيب / ابراهيم الشرع عشر سنين
6- نقيب / محمد ابوزيدعشر سنين
7-ملازم أول/ ابراهيم الجعفرى عشر سنين
8-ملازم أول/ احمد ابو الحسن عشر سنين
9-ملازم أول/ احمد رشاد عشر سنين
10-ملازم أول/ محمد رفعت عشر سنين
11- ملازم أول/ مصطفى عبد المجيد عشر سنين
12-ملازم أول/ أحمد سمير عشر سنين
13-ملازم أول/ محمد الوديع عشر سنين
14-ملازم أول/ ياسر بخاتى  منتظر حكم
15-ملازم أول/ حسين سعد  منتظر حكم
16-ملازم أول/ محمود بدير  منتظر حكم
17-ملازم أول/ احمد الخولى  منتظر حكم
18-ملازم أول/ رامى احمد  منتظر حكم
19-ملازم أول/ محمد الحنفى  منتظر حكم
20-نقيب/ محمد فهمى منتظر حكم
21- رائد / محمد عمر منتظر حكم
22-رائد / احمد نجدى منتظر حكم
ياريت الناس تحاول تشغل مخها شوية وتشوف الحقيقة..حقيقة المجلس وهى هتعرف حقيقة الظباط اللى نزلوا وفضحوه..
ربنا ان شاء الله هيخرجهملنا بالسلامة وهنكمل الثورة سوا باذن الله وكل يوم بيعدى والشرفاء خلف الاسوار يعتبر وسام ونتشان على صدورهم وخزى وعار على مجلس مبارك
الظباط لما حلفت يمين الولاء حلفته لمين؟ لمبارك؟للمشير؟ ولا لمصر والحفاظ عليها؟ طبعا الظباط دول من اللى حلفوا انهم يحموا مصر بآخر قطرة من دمهم (مصر ها؟ مصررررررررررررررررر) والظباط يوم ما نزلت نزلت عشان مصر يبقى ايه جريمتهم؟ انا اقول جريمتهم هم حبهم وولائهم لمصر اللى بيجرى فى كل شريان فى دمائهم..بصراحة ونعم الجريمة ده جريمة تشرف
صحيح دلوقتى الشرفاء هما اللى محبوسين والمجرمين هما اللى بره لكن قريب اوى ان شاء الله هتتعدل الصورة وكل واحد هياخد حقه ويروح المكان اللى يستحقه

حملة مع المجلس هتلاقى العجب "الجزء التانى"

حملة مع المجلس هتلاقى العجب...اتحكم على كبش فدا امين شرطة بالاعدام وطلع هرباااااان..الكبش طلع هربااااااان يا منز

حملة مع المجلس هتلاقى العجب..بيدوا الظباط اللى نزلت التحرير احكام بعشر سنين وسايبين اللى قتلوا الثوار بره ومفيش محاكمات اصلا.. بصراحة منتهى العدل يا مجلس

حملة مع المجلس هتلاقى العجب..نخلص من اللى قالوا علينا فى الثورة الاولى ان احنا اجندات وعملاء يطلعلنا عتمان بس قبل الثورة التانية ويتحفنا بنفس الكلام

حملة مع المجلس هتلاقى العجب...يعملوا حوار وطنى ويجيبوا فيه الحزب الوطنى ومرتضى منصور ومحمد ثروت...والوزارة تقول مش حنا اللى دعيناهم..امال مين؟ اللهو الخفى يمكن

حملة مع المجلس هتلاقى العجب..طنطاوى يقول ان الامن والشرطة مكنش ليهم ايد فى اللى حصل!! وانهم عملوا دورهم على اكمل وجه..تقريبا الكائنات الفضائية هى اللى ضربتنا

حملة مع المجلس هتلاقى العجب..الحق عرض الموسم..طلع 2 اخلاء..يطلع التالت هدية ولو اتصلت فورا سوف تحصل على بلونة هدية

حملة مع المجلس هتلاقى العجب..فى اليوم اللى المجلس سامح بتوزيع المنشورات اللى بتأيده يقبض على واحد من اللى بيوزعوا منشورات للنزول يوم الجمعة 27 ..فعلا المجلس العسكرى ام الاجنبى

حملة مع المجلس هتلاقى العجب...بعد مرور 4 شهور جايين يكتشفوا اختفاء 3 ظباط لا وكمان عرفوها من برنامج..حقيقى اللى يعيش ياما يشوف

حملة مع المجلس هتلاقى العجب... بيقولوا اللى نازل يوم 27 هيبقى مع اسرائيل..ايه ده هو المجلس هو اللى نازل ولا ايه؟

حملة مع المجلس هتلاقى العجب...المحاكمة مستويات برضه يعنى مبارك يتحبس فى شرم والمحاكمة تتأجل عشان تعبان لكن الناس التانية تترمى فى زنانزين غير ادمية اصلا

حملة مع المجلس هتلاقى العجب...بيعلجوا مبارك نفسيا وبفلوسنا وياريته تعبان فعلا وسايبين الناس اللى مفروض تتعالج فعلا...قمة العدل

حملة مع المجلس هتلاقى العجب...لما نزلت صورة علاء مبارك المتفبركة  راحوا يدوروا مين اللى صورها.. 

حملة مع المجلس هتلاقى العجب...المجلس العسكرى بيقول الجيش لم ولن يقفز على السلطة طيب احب اقوله هيلا هوب ..نطى نطة يا دبدوبة

حملة مع المجلس هتلاقى العجب.. بيقولوا محدش فوق القانون..اذا كان وفقا للاعلان الدستورى هما اللى بيغيروا القانون...اعمل نفسك ميت

حملة مع المجلس هتلاقى العجب..بيقولوا مش هيحموا المظاهرات اللى نازلة المرة ده..يعنى كنت همتوها يوم موقعة الجمل!!

مش هنسى ظباط التحرير اللى نزلوا يوم 8 ابريل وانت كمان مش لازم تنسى

انا مش عارفة ابتدى ازاى من كتر الغضب اللى جوايا انا النهاردة قمت على مكالمة من صحبتى بتقولى الحقى الظباط اللى نزلوا التحرير خدوا 10 سنين..بجد نزل عليه الخبر كالصاعقة مع ان كان وارد ده يحصل.. المهم قدر الله وماشاء فعل ولعله خير وانا مش حعقد ابكى على اللبن المسكوب لان العياط مش هيخفف الحكم  ولا هيحل حاجة بس فيه حاجات ممكن  تساعدهم فعلا..اهمها اسقاااااااااط المجلس العسكرى والدعااااء..

فيه ناس كتييييير مش مقتنعة بالظباط دول وبتقول هما نزلوا ليه اصلا وليه حاشروا نفسهم وسطينا دول بجد خونة ووحشين ومدسوسين ماشفولهم مكان تانى ينزلوا فيه ..لو عندهم مطالب ما بطلعوا جوه ليه بره ؟ انا هرد لآخر مرة على الناس ده..ماشى ممكن اللى عملوه ده تهور طيب ما احنا كمان اللى علمناه يوم 28 جنون..وبعدين ايه موضوع حاشروا نفسهم فى وسطينا ويشوفولهم مكان تانى يتظاهروا فيه!!!.. احب اقول للى بيقول كده ده على اساس ان البلد ده بلدك لوحدك مش بلدهم ولا ايه مش فاهمة يعنى ومنين بتقولوا ان الجيش اخواتنا واباهتنا وولادنا..فجأة بعتوا اهلكم فى ثانية كده..امال مقلتوش على شومان كده ليه مع انه برضه نزل وسط المدنيين وكمان هتف ساعتها ضد مبارك وطنطاوى..انا بقدر شومان بس بصراحة الظباط دول اشجع كمان من شومان لانهم نزلوا فى وقت اصعب بكتيييييييير من وقت مبارك لان ساعة مبارك كان الناس ايد واحدة والناس كانت مجتمعة على كره مبارك على عكس الظباط اللى نزلوا والناس اتفرقت واغلبهم نايم تحت تأثير البنج العسكرى.. وبعدين هما نزلوا عشان يكشفوا حقيقة المجلس اللى كل يوم كلامهم بيتأكد ..ودول مش خونة ولا مدسوسين ياا ناااس بذمتكو دول لو خونة هينزلوا على عينك يا تاجر ويضحوا بمستقبلهم وحياتهم عشان خاطر ايه؟؟...طيب مدسوسين ازاى ومين اللى دسهم المجلس يعنى ولا ايه؟ يعنى المجلس هينزلهم يفضحوه ولا اسرائيل وامريكا يعنى؟ بجد كلام فاااضى وملوش معنى..  هما نزلوا يفضحوا المجلس  ويطالبوا بنفس مطالبنا اللى من اول يوم بنطالب بيها مقلوش حاجة غريبة يعنى..وأرد على هما ليه طلعوا بره يتظاهروا..طلعوا عشان صوتهم يوصلنا اصلهم لو قالوا جوا هتفرق فى ايه يعنى ولو ماتوا حتى محدش هيعرف..طيب كان  فيه حد يعرف محمد وديع واغنيته اللى غناها واللى اتحبس بسببها واسمعوا الاغنية عشان تعرفوا هو اتحبس ليه ..انا عن نفسى مكنتش اعرف الاغنية ولا اعرفوا غير بعد 25 يناير..انا مش عارفة ليه وديع بالذات معلم معايا (انا محروق قلبى على كل الظباط بس وديع معلم معايا) يمكن عشان اغنيته بجد كلامها حقيقى أوى ولا يمكن عشان لما شفت الفيديو بتاع مامته اللى بتحكى فيه على اللى عملوه معاه وقت القبض عليه ويمكن كمان لما سمعت عتمان لما طلع مع يسرى وشوه سمعته....اصل افتكرت الكلام اللى كان بيتقال على الثوار فى الميدان (طلعت زكريا سابقا وعتمان حاليا)

واهى الاغنية:

وده كلام والدة وديع :

انا عارفة قانون العسكرية ان مش مسموح للعساكر انهم يتظاهروا بس اشمعنى شومان سامحوه(ده كان فى الاول بس الله اعلم هو فين دلوقتى ؟؟محبوس ولا لا) كل ده عشان الناس اهتمت بيه والموضوع انتشر(طيب بتفكرونى كل مرة يتقبض على شباب يطلعوا بس الناس اللى معروفة وينسوا الباقى..كأن التانيين بلطجية او ميتسهلوش)) ..طيب هما الظباط دول ولاد البطة السودا وملهش اهل ولا ايه؟؟؟ انا بجد ببقى عايزة اخنق المجلس لما بحط نفسى مكان اهالى الظباط دول...كل يوم يماطلوهم ويقولهلم بكره وبعدين يجى النهاردة يقولهلم خلاص مفيش النهاردة ويكتشفوا انهم اتحكم عليهم بعديها بعشر سنين...نفس الحالة ده بتجيلى ويمكن اكتر لما احط نفسى مكان اهالى الشهدا اللى بجد الله يصبرهم شايفين المجرمين مش بيتاكموا وبيترقوا كمان وبيهددوهم والناس ساكتة..يعنى لو كل واحد حط نفسه مكانهم هيعمل ايه؟ يعنى لو اللى ماتوا واتصابوا واعتقلوا ولاد المشير مثلا او حد من المسئولين  كان زمان الكلاب ده اتعدمت فى ميدان عام فى ساعتها  بس العدل بميزانين يعنى اللى قتلوا الثوار بيتحاكموا(دول لو اصلا كانوا بيتحاكموا) مدنيا واللى نزلوا بشجاعة وشرف يتحاكموا عسكريا بجد حسبى الله ونعم الوكيل..

انا كتبت من كتر حزنى عليهم لانى حاسة بالذنب ان الكل باعهم وخانهم..اينعم انا كنت مصدقاهم من اول يوم وبساندهم بس معرفتش اعمل حاجة ليهم والاحساس ده وحش اوى وحاسة انى مقدرتش اعمل حاجة ليهم وذنبهم فى رقبتى انا كمان مش فى رقبة بس اللى خونوهم وباعوهم وبلغوا عنهم وكرهوا الناس فيهم.....

صحيح وانا بكتب سمعت مكالمة مصعب الشاعر اللى فعلا وجعت قلبى بس عايزة اقول حاجة فعلا حالة مصعب مؤلمة بس يمكن كمان حالااااااااااااات كتير اصعب منها واحنا للاسف نسناهم وانشغلنا عنهم وده مش غلطة المجلس ده غلطتنا احنا اللى انشغلنا بحاجات تبعدنا عن الهدف الرئيسى..نقدر نصلح غلطنا ده بأننا ننزل ونسقط المجلس العسكرى ومعاه فى السكة الائتلاف وكل الاقنعة اللى بتركب الموجودة وساعتها هنقدر ناخد بحق الشهداء والمصابين والمعتقلين (ومنهم ظباط 9 ابريل)

وياريت مننساش الظباط دول يوم ما ننزل ان شاء الله 27 مايو زى ما نسينا المعتقلين والمصابين والشهداء..

وده المكالمة:

زمن العتاب انتهى

بجد انا هجيب من الاخر عشان الموضوع بوخ اوى واللعب بقى على المكشوف احنا ان شاء الله هننزل يوم 27 مايو عشان حاجة واحدة اسقاااااااااااااط المجلس ..طيب دلوقتى الناس هتقولى انتى ايه اللى بتقوليه ده ..نسقط ايه ومعرفش ايه..فين بقيت المطالب يا حجة؟؟ هقول حاجة واحدة ان اسقاط المجلس العسكرى مش طلب ده أمرولازم يتنفذ..أيوة أمررر حد عنده مانع؟؟ الشعب هو اللى بيدى الاوامر وعلى اللى بيحكم يطيع وينفذ ارادة الشعب مش كده ولا ايه؟؟؟..امال احنا شلنا مبارك عشان نجيب العن منه ولا ايه؟؟ لو فاهمة غلط حد يقولى .. اما بالنسبة للمطالب بقى.:: حاجة بسيطة اوى لما المجلس هيسقط كل حاجة هتبقى سهلة بعد كده.ان شاء الله

.من اول :محاكمة آل مبارك وكل رموز الفساد هتتحاسب واللى قتلوا الثوار وعذبوا الناس ومش هننسى طبعا اللى اتعمل فى البنات ..هى صحيح الرجولة راحت فين يعنى وسايبين البنات بيتهانوا كده..والناس اللى كهربت وعذبت الثوار فى المتحف والسجن الحربى وعند السفارة ..ياريت يا جماعة مننساش الظباط اللى ضحوا بحياتهم ومستقبلهم لا وكمان اتشهر بيهم وبسمعتهم والناس خونتهم وباعتهم عشان يوصلولنا حقيقة المجلس اللى بقت باينة دلوقتى  لاى حد..ومحاسبة كل الفاسدين اللى افسدوا مصر وقتلوا شعبها وحاولوا يدمروها

ثانيا: الافراج الفورى على كااااااافة المعتقلين السياسيين قبل وبعد 25

ثالثا:الغاااء المحاكمات العسكرية للمدنيين واى حدخد احكام معوقف تنفيذ تتلغى فورااااااااا يعنى ايه شاب ياخد حك ويبقى سوابق يا مجلس

رابعا: الغاء قانون الطوارىء

خامسا: حد اقصى وادنى للاجور..مش صعبة يعنى نزل من اللى فوق يعلى اللى تحت

سادسا:عودة الامن للشواره لو الداخلية مش عايزة تنزل يا تقعد فى البيت يا تتحبس احسن..واحنا مستعدين ننزل نحمى بنفسنا واظن عملناها قبل كده

سابعا: تشكيل وزارة بجد مش وزارة وزارئها قدام امثال سيد مشعل وفايزة ابو النجا ووزير الكهربا وغيرهم وكلهم معديين السن اصلا  او زى حواس كده مثلا..

ثامنا: علاج مصابى الثورة على نفقة الدولة وتكريم الشهداء بجد مش بس بتحية

ده اللى فاكراه دلوقتى بس لو افتكرت مطالب ان شاء الله هنحطها فى الخطة

واحب اقول لاى حد مسئول حتى لو كان مين..كرامة المصرى هية الخط الاحمر والالوان كلها ومحدش هيسمح لحد بعد كده بإهانة المصرى....يعنى ايه يعنى شباب عند السفارة يتعاملوا زى اسرى الحرب ويمكن ابشع كمان ..ايه واضح انكم نسيتوا نفسكوا بس خلااااص و واضح انكم مش هتفوقوا الابطريقتنا ولو فكرتو بس انكم تضربوا أوحتى تهينوا حد تانى متلوموش الا نفسكم ..واتقى شر الحليم اذاغضب وبقولها تانى المصرى راسه هتفضل عالية ومرفوعة ان شاء الله ومش ممكن هنطاطى تانى ابدااااا

مننساش هدفنا اسقاااااااااااااااااااااااااااااااااااااط النظاااااااام بكل شباكه وخيوطه واديه ورجليه وفلوله وسلطاته وبابا غنوجه ومش هنتحرك الا لما ده يحصل ان شاء الله ولازم ننركز على ده ومنشتش نفسنا لان الاتحاد قوة...ولازم يكون فيه اعتصاااااااااااااااااااااااااااااااااااااااااااااااااااااااااااااام حتى اسقاط المجلس  اللى هو جزء اصيل من النظام غير كده يبقى بنضحك على نفسنا وبنضيع وقت عالفاضى ونقول للشهدا احنا اسفين انكم ضحيتوا بحياتكم عشان ناس متستهلش ناس جبنا وخايفة ..

لو بجد عايزين نسقط الفساد وتححقوا كل المطالب اللى فاتت يبقى لازم نركز على اسقاط المجلس

حملة مع المجلس هتلاقى العجب

1- شعار حملة مع المجلس هتلاقى العجب..انا وابن عمى على الغريب..طبعا مفهوم مين هما ولاد العم وطبعا احنا(الشعب الغريب

2-حملة مع المجلس هتلاقى العجب..هيحققوا مع المذعين والمواقع فى الكسب الغير مشروع عشان بيعملوا فتنة..وسايبين ابو القتن كلها..

3-حملة مع المجلس هتلاقى العجب.فى المحكمة تلاقى 3/4 اللى قاعدين يا امن دولة يا محامين المجرمين والربع الباقى ده لو حصل الربع اصلا محاميو الشهدا

4-حملة مع المجلس هتلاقى العجب...المفروض يعنى مبارك محبوس احتياطى والمفروض برضه يروح طرة يقولك مش هنوديه عشان عنده اكتئاب ..اه يا حنين

5-حملة مع المجلس هتلاقى العجب..الظباط اللى قتلت الثوار والفروض عليها قضايا اترقت وشغالة عادى ولا كأن فيه حاجة حصلت

6-حملة مع المجلس هتلاقى العجب...سوزان تبقى سيدة مصر الاولى فى سرقة البلد وبعدين تاخد اخلاء ويقولك رجعت الفلوس وخلاص...

7-حملة مع المجلس هتلاقى العجب...قال ايه المجلس عامل لنفسه وقفة وجايب ناس تشكره عند المنصة   

8-حملة مع المجلس هتلاقى العجب..المشير يطلع يشكر الداخلية ويشيد بالامن الوطنى اللى هو امن الدولة بس عامل نيو لووك  

9-حملة مع المجلس هتلاقى العجب..كان بيقولوا انهم ميعرفوش الظباط اللى نزلت التحرير ظباط فى الجيش ولا لا..طب ده كلام امال مين اللى هيعرف..

10-حملة مع المجلس هتلاقى العجب..لو مكنتش انت تكهربنى مين هيكهربنى...

11-حملة مع المجلس هتلاقى العجب..المجلس ينزل بيان يقولك مفيش معتقلين وبعدين يطلع بيات تانى انه هيفرج عن الثوار الشرفاء

12-حملة مع المجلس هتلاقى العجب يطلعوا خبر انتخاب الشرطة والجيش على جروب الوزارة ويقولوا بطلوا اشاعات

13- حملة مع المجلس هتلاقى العجب..بيقولك المجلس اللى حمى الثورة اما مين اللى فتح الثغرة يوم موقعة الجمل..

14-حملة مع المجلس هتلاقى العجب..نقول طلعوا المعتقلين السياسيين..يطلعولنا زكريا وسوزى وسرور وابراهيم كامل ومرتضى

15-حملة مع المجلس هتلاقى العجب نقول عايزين دستور جديد يعملوا استفتاء على القديم..تعملوا استفتاء على 9 مواد يطلع اعلان ب63 مادة

16-حملة مع المجلس هتلاقى العجب..يقولك استفتوا على الدستور يطلع ان احنا استفتينا على شرعية المجلس

17-حملة مع المجلس هتلاقى العجب..المجرمين واللى نهبوا البلد وقتلوا يتحاكموا مدنيا والثوار يتحاكموا عسكريا..

18-حملة مع المجلس هتلاقى العجب..بيقولك حرية الاعلام والصحافة امال اللى حصل مع الشروق وبثينة كامل ايه ولسه بتوع التوك شو..

 19-حملة مع المجلس هتلاقى العجب...نخلص من كلام طلعت زكريا يطلعلنا اسماعيل عتمان...

 20-حملة مع المجلس هتلاقى العجب..فى يوم ذكرى مذبحة البقر يسرى كان هيعيط ويطلع اللهو الخفى يقول عايزين نفرفش

21-حملة مع المجلس هتلاقى العجب..يطلع عتمان يقول على وديع انه كان بيجيب بنات معاه جوه الوحدة.ده على اساس ان الوحدة كباريه ومسموح اصلا انهم يدخلو

22-حملة مع المجلس هتلاقى العجب..بيقولوا مش هينفع يهينوا حد من المؤسسة العسكرية..امال اللى عملتوه فى الفريق سعد الشاذلى الله يرحمه ايه؟

23-حملة مع المجلس هتلاقى العجب...يقولوا انهم حموا الثورة امال ليه المشير بيلمح انها زى النكسة

24-حملة مع المجلس هتلاقى العجب....بيقولوا مفيش فلوس والاقتصاد منهاااار..امال فين دخل قناة السويس والسياحة الخ

25-حملة مع المجلس هتلاقى العجب....خلصنا من مبارك يطلعلنا 19 مبااارك

26-حملة مع المجلس تلاقى العجب... بيقولا لن نتستر على اى فاسد امال انتوا تبقوا ايه؟؟؟

27-واخيرا وليس آخرا مع حملة مع المجلس هتلاقى العجب...يوم 27 مايو انت يا  مجلس اللى هتشوف العجب واللى عمرك مشفوتوا..

دول 27 تويتاية بالظبط عشان يوم 27 مايو....

ثورة الغضب الثانية

ثورة الغضب الثانية 27 مايو(لا تراجع ولا استسلام)

انا اول مر أكتب بس بصراحة مش هلاقى أنسب من المناسبة السعيدة ديه عشان أقول الكلمتين المحشورين..

أولا: احب اوجه كلمة (بس كلمة كبيرة شويتين) للمجلس ومش هقول مجلسنا لانه فعلا مش مجلسنا ده مجلس مبارك اللى اختار كل واحد فيهم بعناية فائقة وعالفرازة مش اى اى يعنى..

يا مجلس انتو ممكن كنتو تخلونا(احنا الشعب) نخلد اسمكم فى التاريخ ونتناسى انكم رجالة مبارك وولاءكم ليه(هو صحيح لو حد قعد 20 سنة مبارك بيستشيره يبقى ولاءه لمين) ونتغاضى على انكم سكتوا سنييييييييييين على الفساد (الساكت عن الحق شيطان اخرس تخيل لو مشارك كمان يبقى ايه؟؟؟) ومش هنفتكر بقى العمالة والكلام ده وولاد العم والماما والعيلة كلها..وطبعا كنا هنعمل نفسنا مشفناش الثغرة اللى اتفتحت وخلت الجمال والحمير يعدوا ويقتلوا الثوار فى موقعة الجمل وكنا هناخد مسكنات على الحالة النفسية المدمرة اللى وصلها الجيش المصرى وتصنيع البوتجازات وطبعا معروف تحت رعاية مين..

بس للآسف أنتوا بعتوا الغاااااااالى قوى بالرخيص والرخيص جدا كمان (صحيح الغالى اللى هو احنا الشعب وطبعا معروف مين الرخيص..ده مجرد توضيح عشان اللى لسه مبيفهمش)

بس خلااااااااص فاااااااااااااات الاوان..رصيدكم خلص من زماااان كمان..احنا بقى قطعنا الخدمة نهائيا ومبقاش فيه خاصية سلفنى شكرا..اصل احنا مش بنحب اسلوب الشحاتة زي ناس كده...

·       الشعب خلاااااااااااااااااص فاض بيه وفاق من جرعات البنج والمسكنات المضروبة والتمثيليات التركية(اللى مش بتخلص) والمحاكمات الهزلية والبلالين اللى نفختونا بيها.. ونازل تانى التحرير يوم مايو27 ان شاء الله ومش راجعين غيرلما نور الشمس يسطع على كل شبرفى مصرنا الحرة ويٌسقط النظام بجد المرة ده مش زى اللى فاتت...

ثانيا: كلمة بسيطة للناس اللى بتقول كفاية والعجلة والاستكرار والاقتصاد والكلام ده..لو عندك كلمة عدلة قولها يا اما تقعد زيك زى الكنبة اللى انت قاعد عليها وتنقطنا بسكاتك وتسيب_ اللى عايزين حريتهم وكرامتهم ترجع _فى حالهم ..مشفكقاية انكو هتاخدوا كل حاجة على الجاهز...ياللا كله بثوابه ..

معاش طولت شوية بس والله حاولت اختصر ده انا حتى مجبتش سيرة فض الاعتصامات بتاعت 9مارس وكشف العذرية و9 ابريل وعلى ماهر والظباط الشرفاء ايمن سالم وكلية الاعلام وماسبيرو وامبابة والسفارة والمعتقلين ودم الشهداء والمصابين اللى اتنسوا والقتنة والتعذيب ورامى فخرى والاعلان الدستورى اللى قسم الشعب 2.....الخ

اشفكوا بقى يا ثوار ان شاء الله فى الميداااااااااااااااااااااااااان..متنسوش معادنا 27 مايووهدفنا اللى نازلين عشانه مجلس مدنى وده مش طلب ده حاجة واجبة التنفيذ ومش هنسيب الميدان الا بسقوط النظااام  المطالب

___________________________________________

باعوك يا وطنى وضعت مع غدر الزمان

الغلطة مش غلطتك ده غلطة كل جبان

بس اوعدك انى ارجع كل شىء احسن مما كان

ويوم 27 هنزل واروح الميدان

عشان احقق حلم الشهيد اللى مات

بحلم بوطن مفيهوش فساد

كل ولاده بيخافوا عليه من غدر الاوغاد

يرووه بعرقهم ويعمروه بكفاحهم

يبنوا المجد ويعلو صوت الحق

يشيلوا الظلم ويزيلوا القهر